వయసుతో సంబంధం ఏంటి?.. 60 ఏళ్ల ఆమిర్ ఖాన్ మూడో పెళ్లిపై సీనియర్ నటి సంచలన వ్యాఖ్యలు!

బాలీవుడ్ మిస్టర్ పర్ఫెక్ట్ ఆమిర్ ఖాన్ (61) మూడోసారి పెళ్లి పీటలెక్కేందుకు సిద్ధమవుతున్నాడు. గత రెండేళ్లుగా తనతో రిలేషన్‌షిప్‌లో ఉన్న భాగస్వామి గౌరీ స్ప్రేట్ (47)ను జులై 5న వివాహం చేసుకోబోతున్నాడు. ముంబైలోని ఆమిర్ ఖాన్ నివాసంలో అత్యంత ఆప్తులు, కుటుంబ సభ్యుల సమక్షంలో ఈ రిజిస్టర్ మ్యారేజ్ చాలా ప్రైవేట్‌గా జరగనుంది. అయితే, 60 ఏళ్లు దాటిన వయసులో ఆమిర్ మూడో పెళ్లి చేసుకోవడంపై సోషల్ మీడియాలో వస్తున్న విమర్శలపై సీనియర్ నటి రాఖీ గుల్జార్ తీవ్రంగా స్పందించారు. ఆమిర్ నిర్ణయానికి ఆమె పూర్తి మద్దతు ప్రకటించారు.

తాజాగా ఇచ్చిన ఒక ఇంటర్వ్యూలో రాఖీ గుల్జార్ మాట్లాడుతూ.. "నాకు ప్రస్తుతం చిత్ర పరిశ్రమలో జరుగుతున్న విషయాలతో పెద్దగా సంబంధం లేదు. నేను ఆమిర్ ఖాన్‌తో ఎప్పుడూ కలిసి పనిచేయలేదు. కానీ ఆయన చాలా నిజాయతీ గల వ్యక్తి అని నాకు తెలుసు. ఇద్దరు భార్యలతో (రీనా దత్తా, కిరణ్ రావు) విడాకులు తీసుకున్న తర్వాత కూడా వారితో ఆమిర్ ఇప్పటికీ మంచి స్నేహబంధాన్ని కొనసాగిస్తున్న తీరు నాకు ఎంతగానో నచ్చింది. ఇది ఆయన వ్యక్తిత్వానికి నిదర్శనం" అని కొనియాడారు.

వయసుతో పనేంటి?.. విమర్శకులకు చురకలు
60 ఏళ్ల వయసులో పెళ్లి చేసుకోవడంపై వస్తున్న విమర్శలను రాఖీ గుల్జార్ పూర్తిగా కొట్టిపారేశారు. "60 ఏళ్ల వయసులో పెళ్లి చేసుకుంటే తప్పేంటి? హాలీవుడ్ స్టార్ రాబర్ట్ డి నీరో తన 70, 80 ఏళ్ల వయసులో మళ్లీ తండ్రి కాలేదా? వివాహ జీవితంలో ఆనందం, తోడు అనేవి వయసును బట్టి నిర్ణయించబడవు" అని ఆమె చురకలంటించారు. ఈ సందర్భంగా తన సొంత జీవితాన్ని కూడా ఉదాహరణగా చెప్తూ.. ప్రముఖ కవి, రచయిత గుల్జార్‌కు దాదాపు 40 ఏళ్ల వయసు ఉన్నప్పుడు తాను వివాహం చేసుకున్న విషయాన్ని ఆమె గుర్తుచేశారు.

ఎవరీ గౌరీ స్ప్రేట్?
బెంగళూరుకు చెందిన గౌరీ స్ప్రేట్ ఫ్యాషన్, బ్యూటీ, వెల్‌నెస్ రంగంలో బిజినెస్ పర్సన్‌గా రాణిస్తున్నారు. ప్రస్తుతం ఆమె ముంబైలోని 'బి బ్లంట్' (BBlunt) సెలూన్‌ను నిర్వహిస్తూనే, 'ఆమిర్ ఖాన్ ప్రొడక్షన్స్'లో కూడా భాగస్వామిగా పనిచేస్తున్నారు. గత ఏడాది మార్చిలో ఆమిర్ ఖాన్ తన 60వ పుట్టినరోజు వేడుకల సందర్భంగా గౌరీని మీడియాకు తన భాగస్వామిగా అధికారికంగా పరిచయం చేశారు. గౌరీకి తన మొదటి వివాహం ద్వారా 7 ఏళ్ల కుమారుడు (క్విన్) ఉన్నాడు. జులై 5న జరగబోయే ఈ వివాహ వేడుకకు బాలీవుడ్ స్టార్ హీరోలు షారుఖ్ ఖాన్, సల్మాన్ ఖాన్‌లు కూడా హాజరయ్యే అవకాశం ఉందని టాక్ వినిపిస్తోంది. సినిమా ఇండస్ట్రీకి చెందిన సుచిత్ర కృష్ణమూర్తి వంటి వారు కూడా ఆమిర్ నిర్ణయాన్ని ఎంతో ధైర్యమైనదిగా అభివర్ణించారు.